الاثنين، يونيو 15، 2015

الزوج الثاني



الحمد لله 
مستوايا المادي و الاجتماعي بقى ممتاز
بعد سنين التعب و الشقى حياتي استقرت.
الواحد وصل منتصف العمر لكن الصحه تمام.
مش ندلع بقا؟
المدام , أم العيال على عيني و راسي و كل طلباتها مجابه. رفيقة الكفاح و مقدرش استغنى عنها.
الواحد مش هيعمل حاجة تغضب الله , و ان شاء الله كله على سنة الله و رسولة. 
عصفورة رقيقه كدا تدلع الواحد و يشوف معاها يومين في الجنه. 
نسمة رطبه بدل الجو الجامد اللي الواحد عايش فيه ليل و نهار.
واحدة تكون عاقله , و عاوزه راجل خبرة و جاهز مش شباب اليومين دول اللي ميعرفوش اصلا يعني ايه جواز و استقرار!!!! او لسه بيكونو نفسهم و يمرمطو بنات الناس معاهم!!!





توكلنا على الله


الحمد لله 
مستوايا المادي و الاجتماعي بقى ممتاز
بعد سنين التعب و الشقى حياتي استقرت.
 الواحده وصلت منتصف العمر لكن الصحه تمام, الجمال تمام, محافظه على نفسي و يمكن أكتر
مش ندلع بقا؟
الراجل ابو  العيال , زوجي العزيز على عيني و راسي. و هنفضل اصحاب بعد الطلاق.
مقدرش استغنى عنه في تربية الاولاد اللي بينا ...
الواحده مش هتعمل حاجة تغضب الله ,  طلاق و بعدين جواز ان شاء الله كله على سنة الله و رسولة. 
شاب جامد كدا  و لسه بشوكه يدلع الواحد و يشوف معاه يومين في الجنه. 
نسمة رطبه بدل الجو الجامد اللي الواحد عايش فيه ليل و نهار.
واحد يكون عاقل , و عاوز ست خبرة و جاهزه مش بنات اليومين دول اللي ميعرفوش اصلا يعني ايه جواز و استقرار!!!! او لسه بيكونو نفسهم و يتمرمطو  !!!
توكلنا على الله
---------------------------------------------------------------------------
.
.
.
.

الحوار اللي في النص الاول معروف .... تقليدي .... مجتمعنا بيتعرف عليه و الناس توافقه احيانا و تلعنه احيانا على حسب مكانها في المجتمع و نوعها و شخصيتها. الحوار اللي في النص التاني مش تقليدي .... و قد يكون حاليا الناس في مجتمعنا بيلعنه او عالاقل بيتحفظ عليه (الكائنات الفيمينست يمتنعون) لكن في رأيي دا عين العدل ... اذا كنت هتلعن الحوار الاول لازم تلعن التاني .... و اذا كنت هتتفهمه لازم تتفهم التاني .... الاتنين مبيعملوش حاجه حرام .... عشان نخرج من دايرة اللغط في الشرع .... بس الاتنين بيسددو ضربه في الغالب موجعه لشريك الرحله . و اذا فكرت انك تعمل كدا ... لازم تبقى عارف ان العكس ممكن يحصلك .... لو راجل قد يكون الموقف مازال أقل احتمالا من شريكة حياتك .... بحكم التقولب الي بيزرعه المجتمع في الست حتى الان ... بس عالاقل حط نفسك مكانها او خليك عارف ان القوالب المجتمعية اللي بتحميك نفسيا دي مش أكيد هتدوم ....

 للجميع ... خليك مخلص و بلاش فراغة عين

السبت، يناير 17، 2015

كل هذا العفن



الارزاق بيد الله .... مفيش بني ادم ممكن ياخد رزقك
------------------------------------------------
متولي: حضرتك انا طبيب بشري , يعني مش بكشف على كلاب!!! مفهمش فيها
السنيورة: الكلب عنده برد ... يكح و يعطس .... انت مش تفهم؟ اكتب الدوا اللي تكتبه للبني ادم عادي
متولي: ما ينفعش حضرتك ... الدوا دا غير دا... الحيوان غير الانسان... و ادويتهم مختلفه
السنيورة: و الله يا دكتور احيانا الجيوان يفهم اكترمن الانسان.....اقولك اكتب دوا البرد بتاع الانسان و خلاص.... انت عارف انا ابقى مين؟ فاهم و الا ما تفهمش؟
متولي: افهم يا هانم افهم.... و ادي الدوا اهه... و سلميلي على لولو يا هانم



الصدق منجي ... و المسلم لا يكذب
----------------------------------
متولي: بص يا حبيبي المدرس دا موجه في المديريه , و عارف اسئلة الامتحانات اللي جايه , عاوزك تحلها كلها معاه
الابن: حاضر يا بابا
متولي: و عاوزك لو جاتلك حاجه مش عارفها في الامتحان تحاول تتصرف ... زميلك , زميلتك... لازم تجيب درجات عاليه
الابن: حاضر يا بابا



الرشوة حرام ... الراشي و المرتشي و الرائش في النار
---------------------------------------------------
متولي: بصي يا بنت الحلال احنا لازم نلاقي حد يدخلنا الواد الكلية العظيمه دي. لازم نشوف مين بيقبض
الزوجه: كتير كتير يا متولي ... بس المشكله انهم بياخدو فلوس كتير ... و لازم تعرف تدي لمين اصلا عشان ميضحكش عليك
متولي: احنا نعمل اللي علينا و الباقي على ربنا.... يعني الواد لما يتخرج من الكليه دي هيبقى باشا  و... و هينفع نفسه و هنلاقي حد 
نتسند عليه... بس



الطيبون للطيبات ... اظفر بذات الدين ... تخيرو لنطفكم
-----------------------------------------------------
متولي: لا يابنت الحلال العريس دا مينفعناش... ممعهوش ... و اللي ممعهوش ميلزموش
الزوجه: بس بنتك بتحبه و مش بتحب قريبك التاني دا.... و اهو محترم و سيرته ممتازه ... لكن قريبك دا عارفين انه هلاس و ملوش الا في التهجيص
متولي: لكن من عيله كبيره و غنيه ... و هيتاقل بنتك بالدهب!!! عاوزانا نرمي بنتنا للتاني دا و يشحططها معاه؟
الزوجه: لا يا اخويا و يشحططها ليه... خلينا مع الجاهز ... و بكره الجواز يعدله
متولي : توكلنا على الله