الأحد، يوليو 12، 2009

غلب و الا نداله يا عمي يا ابنودي؟

من زمان و انا بحبها
و في عروقي صوتها و رسمها
مصر بلدي من قبل معرف اسمها
مصر التي في خاطري ضيعت عمري بدور عنها
لقيتها ضاعت من عيون اهلها
لقيتها جرح في قلوبهم عايشين على ذكرها
مين يا ترى يا مصري انتا في اهلها
ميت في عباره و الا سرطان في جسمك من اكلها
موظف بسيط و الا عايش و مش عايش في عشوائيات ارضها
مهاجر بيبكي دم على حقه من نيلها و شمسها
بيبكي دم على قهره بين حيطانها و نسرها
نسرها اللي كان رمز لقوتها و عزها
و صبح نار و حديد على كل ايد و روح بتحبها
مصر حبي لكن....غرقت في بحرها
بحر ظلم من اهلها لأهلها
بحر كفر بأسمى معاني حبها
بحر فيه المصري بيخنق اخوه عشان يقب على وشها
يا بلدنا يابلد يالي درويش غنالها و قالها
صدقيني خفت منك يمكن تحن على ابنها
يا عمي يا ابنودي ما تقولشي ندالة اهلها
قول غلبهم قول يأسهم في حبها
قول هما مين قبل متحكم بالنداله على اهلها
قول هما فين وانا اول واحد راح اقولها و اعيدلها
و اجري عليها .. و ادفى في حضنها


-------------------------------------------------------

ندالة أهلها للأبنودي

ميت ألف فرصة عشان أسيب مصر... ولا عمري سبتها
علشان هي بلادي... إللي بجد بحبها
بحبها بكدبها وصدقها
بحب فيها أصالة وندالة أهلها
بحب فيها السهر
بحب زيفها وأصلها
بحب فيها طلعة الشمس... تنور وشها
بحب فيها القمر... طالع يغازل حسنها
بحب فيها المشي... على شط نيلها وبحرها
بحب فيها بناتها... راسمين ملامح شعبها
دي بنت مايصه... وحاطه ورده فـ شعرها
ودي بنت جد... ونازله جري لشغلها
هتلاقي فين بلد فيها الكنايس والجوامع... بتحضن بعضها
مسلم مسيحي... إخوات راضعين طيبة من صدرها
نبع الحنان... ويناموا حاضنين أرضها
هتلاقي فين تاني... بلد كل حاجه فيها تخليك تحبها
هتقولي ظالمه... هقولك برضو بحبها
هتقولي ضالمه... ما هو ده سواد شعرها
هتقولي زحمه... هقولك علشان بنعشق أرضها
هتقولي فيها فساد... هقولك ده من طيبة شعبها
جرب كده تسهر ولو وحدك على ضف نيلها... وحبها
جرب تشوف بنت حلوه مع شاب واقف جمبها بيحبها... شايل في قلبه هموم الدنيا كلها... وبرضو بيحبها
جرب كده تاكل دره وترمس على شطها... وتشوف وشوش الناس واضحك زيها
طب وانت ماشي لوحدك ووقعت في مشكله... مش بتلاقي ألف واحد جمبك بيحلها... لا تعرفهم ولا يعرفوك بس جمعكم حبها
أهي هي دي مصر...
زاحمه ظالمه...
فاسده ضالمه...
مش مهم...
ده كفايه خفت دمها...
هأفضل لمصر أقول وأعيد...
أنا أصلي عاشق أرضها...
وطبعا ده كله كلام في الهوا...
أنا لو تجيني نص فرصة هقول لها...
بالسلامه يا مصر...
ومش عايز أشوف وشها...
وهي دي بقى ندالة أهلها...