السبت، يناير 17، 2009

محدش عارف الخير فين

ما احناطول عمرنا عايشين بنقول الحمد لله

اهي مستوره

اهي ماشيه

اهي هتعدي

و شوفو وصلنا لأيه


"على باب سفارة كندا
لمحت ابليس و ف ايده استمارة
بقوله على فين قالي بص
يا هجرة يا اعارة
يا عم انا كفرت و زهقت
ألاقيش معاك سيجارة

أنا انتهيت خلاص
لا نافع وسواس و لا خناس
و لا ليا عيش وسط الناس
دول عالم مجرمين
عندكوا فائض ف الفساد
ف كل البلاد
و مش محتاجين شياطين

مليش عيش ف البلد دي
بقالي سنين عاطل
و انتوا بتعرفوا تقلبوا الحق باطل
و تسلكوا القاتل
و تمشوا ف جنازة المقتول
و مفيش مشاكل

يا عم ده انا بقيت اوسوس بالمقلوب
و اقول للحرامي كفاية بقى توب
انت لوحدك هتعمل كل الذنوب
و انا ابليس اشتغل واعظ
و لا كمساري ف اتوبيس

يا عم دا انا زمان كنت استنى حد ينسى يسمي
و هو بياكل لقمته
دلوقتي كل اكلكوا ملوث
و بصراحة الواحد خايف على صحته
ده مفيش ضمير اساسا
علشان اموته
كل واحد بمزاجه خربانة زمته
يا عم دا كل حاجة اتسرقت
و كده الاجيال الجديدة من الحرامية
اتظلمت

يا راجل دا من كتر ما لطشت معايا
خرجت ف مظاهرة مع الناس اللى بتقول كفاية
و برضه مفيش فايدة !!


كلمات الشاعر علي سلامة"

يمكن لما متعديش

و كل حاجه تبوظ وتسود في وشنا

نفوق

يمكن

محدش عارف الخير فين


هناك تعليقان (2):

م/ الحسيني لزومي يقول...

اقرأ نص اتفاقية منع تهريب السلاح لغزة
وادعوا الله ان يثبت مصر في عدم التوقيع عليها

الحقيقه المصريه يقول...

دعوه للتضامن
لعلك علمت بالحكم الصادر ضدي بغرامه 42.500 الف جنيه
لاني نشرت مستندات تؤكد خطوره شركه تراست للكيماويات ببورسعيد على البيئه وعلى العمال
وعلى امن مصر القومي
لذا ادعوك لزياره المدونه
والوقفوف على اخر التفاصيل
وارجو في حال الاقتناع بما نشرته
ضد الشركه من مستندات ان اجد تضامنا منكم
لان هناك رساله خطيره جدا موجهه للمدونون المصريون
وأنا اول من تلقى هذه الرساله
فأما ان نتكاتف واما سنقول غدا
اوكلت يوم اكل الثور الابيض

تقبل تحياتي تامر مبروك


http://elhakika.blogspot.com/


http://www.elhaqeqa.com/?page_id=1160