الجمعة، أبريل 14، 2006

مصر أم الدنيا !!!!!

من ساعة معينينا فتحت على الدنيا و احنا بنسمع ان بلدنا مصر دي أم الدنيا
كنا بننبسط قوي قوي من غير منعرف ام الدنيا دي يعني ايه... كنا بنحس انها اكيد معناها حلو ... معناها انها عظيمة و كبيرة .... و احيانا كمان قوية .....
كان لينا حق... لأننا كنا نعرف عن مصر انها بلد الاهرام و الفراعنه ...... يبقة عريقة و تاريخها عظيم.....
كنا نعرف ان فيها النيل و اسكندرية عروسة البحر الابيض و عبد الحليم و ام كلثوم ....... يبقة جميله و حلوه و غندورة .....
كنا زمان ايام حرب .... و شرق و غرب .... و كنا بنحاول ننتصر ... و انتصرنا عبرنا القناة ........ يبقة قوية و أبية و عظيمة ......

كنا بنقول مصر ام الدنيا و بنصدق عشان كل الحاجات دي ... لكن دلوقتي ... لو قلتلي مصر ام الدنيا ... هقلك لحظة من فضلك !!!! ليه !؟؟!!؟ قلي مصر ام الدنيا لية !؟!؟!؟

بلد السحابة السودا .... و الزبالة اللي مالية الشوارع ... و الشحاتين اللي بقو اكتر من الناس اللي ماشيين في الشوارع
بلد صفر المونديال .... و صفر التعليم .... و صفر التصنيع ......
بلد التطبيع مع اسرائيل ..... و التخلي عن القدس ...... و الضرب على القفا لما ورمنا و بنقول كمان.....
بلد التطنيش و التهبيش .... و الفيديو كليب الللي مليان تضبيش ......
بلد مفيش حد عاملها حساب لا غربي و الا افريقي و الا حتى عربي ..........

لو هتقولولي انها ام الدنيا عشان حلوة او قوية او عظيمة .... هقولكم ... كان زمان ....
الدنيا دلوقتي في مصر سودا .... يمكن اكون غلطان و عاوز حد يفهمني ... عاوز حد يبيض الصورة شوية
و يا تقنعني يا اقنعك ..... اوك ... ماشي اساسا احنا كدا متفقين ... انتا مقنعتنيش لغاية دووقتي ( من منولوج لعادل الفار)

كتفك يا استاذ ... وسع شوية يا محترم


اتأخرت كتير في عمايل بلوج ..... كنت مشغول .... كنت مسؤول .... و كنت عاوز ابدأ بداية جامدة ...
النهارده اول بوست ليا بين الناس هنا ... و لسه برضه مشغول ...و مسؤول .. و مش هبدأ بحاجة كبيرة و لا يحزنون ....
اكتشفت ان مفيش حاجه من اللي انا مستنيها هتحصل ... يا ريتني بدأت من بدري ... يمكن كنت استريحت شوية (مع اني مش عارف انا كدا هستريح و الا لأ !؟؟!؟!؟!) بادي في موضوع الانترنت من حوالي 12 سنه .... ايام مكانت فاضيااااا خالص... خصوصا من الناس الللي بيكتبو بالعربي زيي كدا.... و مكنشي فيه حاجه اساسا اسمها تدوين (بلوجز) .... و دلوقتي مع اني اساسا قديم على النت ... لكن جديد في وسط كل الناس اللس بقو وحوش في التدوين ....
معلشي يا جماعه ... انا عارف ان الدنيا زحمه ... بس نساع بعضينا ... كتفك يا استاذ ... وسع شوية يا محترم ... يا انسه معلشي شويه لورا ... ايوة ... شكرا ....
انا جي و كل اللي عاوزه نفكر شوية مع بعض ... بلاش شغل التيك اواي اللي ضيعنا دة ... عاوزين ناخد كام دقيقة نفكر مع بعض... في ايه !!!؟؟؟ في خبر ... في كلمة ... في تجربة ... في قصيدة او حتى خاطره ..... عاوزين نساعد بعض ان يبقى لينا فكر ... لينا شخصية ... لينا رأي ..... كل واحد بطريقته ... كل واحد مستقل ... لكن متفاعل مع الجميع .... يا رب تكونو فهمتوني ... احسن انا احتمال اساسا مكنشي فاهم نفسيي